Wahala don land for Osun State as di National Industrial Court of Nigeria wey sidon for Ibadan, Oyo State talk say make Osun State Governor, Ademola Adeleke, no remove di State Chief Judge, Adepele Ojo, and Michael Obidiya, as the secretary of di state Judicial Service Commission.
Di court give dis order based on two separate suits wey Ojo and Obidiya carry come court through dia lawyer, Oladipo Olasope.
Ojo bin file di suit and drag Adeleke go court on top di mata, she join Osun State Attorney General, Osun State Judicial Service Commission and di state Accountant General join.
Di judge for di mata come yan say make di people no remove, reverse, or terminate Ojo work and condition for di work as di Chief Judge of Osun State “including but not limited to salaries and other pecuniary benefits” until dem look di mata finish.
She still talk say make dem still pay her salary, entitlements, emoluments, remuneration and other benefits as di Chief Judge of Osun State until dem finish to look di mata.
Di court come yan say dem go hear di rest of di mata on December 12, 2023.
Obidiya wey carry anoda suit talk say make dem no remove am as Secretary of di Osun State Judicial Service Commission. Di judge come yan say make dem no remove, reverse or terminate Obidiya work and condition for di work “including but not limited to salaries and other pecuniary benefits” until dem look di mata finish.
Di court still talk say make dem no put Mrs. Abosede Fagbola for di position of secretary of di Judicial Service Commission and make dem no follow di circular wey dem give for November 7, 2023, wey talk say dem wan transfer Mrs. Abosede Fagbola to di Judicial Service.
Di judge still yan say make di Accountant General of Osun State continue to pay Obidiya salary, entitlements, emoluments, remuneration and other benefits. Dem go hear di rest of di mata on December 12, 2023.